Азийн Хөгжлийн Банкны 2.5 сая ам.долларын буцалтгүй тусламжаар хэрэгжих “Coal to Solar (C2S)” төслийг “Улаанбаатар хотын Нэгдсэн төсөл хэрэгжүүлэх нэгж” хариуцаж ажиллана.
Нийслэлийн сонгогдсон гэр хорооллын айл өрхийн халаалт, эрчим хүчний асуудлыг нарны зайн хураагуурт суурилсан сэргээгдэх эрчим хүчний шийдлээр хангах, үйлдвэрлэсэн илүүдэл эрчим хүчийг төвийн цахилгаан сүлжээнд борлуулах, улмаар оролцогч айл өрхүүдийг нүүрстөрөгчийн кредитийн зах зээлд нэвтрүүлэх зорилго бүхий Coal to Solar (C2S) төсөл “Азийн хөгжлийн банк”-ны санхүүжилтээр 2026 оны 3 дугаар улирлаас хэрэгжиж эхлэхээр төлөвлөгдөж байна.
Тус төслийн үйл ажиллагааг “Улаанбаатар хотын Нэгдсэн төсөл хэрэгжүүлэх нэгж” хариуцан ажиллах бөгөөд төслийг санхүүжүүлэгч АХБ-ны төлөөлөлтэй төслийн нэгжийн хамт олон 2026 оны 6 дугаар сарын 3-ны өдөр уулзаж, төлөвлөгөөт ажлуудыг хэлэлцлээ.
Уулзалтад “Азийн хөгжлийн банк”-ны Эрчим хүчний ахлах мэргэжилтэн Atsumasa Sakai, Төслийн үйл ажиллагаа хариуцсан ахлах мэргэжилтэн Victoria Maria Regina, Тээврийн салбар хариуцсан тэргүүлэх мэргэжилтэн Gloria P. Gerilla – Teknomo нар болон төсөл хэрэгжүүлэх нэгжийн холбогдох албан тушаалтнууд оролцлоо.
