Улаанбаатар хотын ногоон орон сууц төслийн хүрээнд “Бодлогын шинэчлэл, ногоон орон сууцны барилгын дүрэм, EDGE хэрэглэгчийн гарын авлагын орчуулга, материалын стандартын төслийн хэлэлцүүлэг”-ийг 2026 оны 6 дугаар сарын 5-ны өдөр амжилттай зохион байгууллаа.
Хэлэлцүүлэгт холбогдох яамд, нийслэлийн удирдлага, хэрэгжүүлэгч агентлагууд, мэргэжлийн холбоод, инженер, архитектор, судалгааны байгууллагууд болон олон улсын санхүүжүүлэгч байгууллагын нийт 76 төлөөлөл оролцож, ногоон барилгын бодлого, стандарт, норм нормативын шинэчлэлийн талаар санал солилцов.
Хэлэлцүүлгийн үеэр ногоон орон сууцны төлөвлөлт, EDGE гарын авлагын орчуулга болон барилгын материалын стандартын төслүүдийг танилцуулж, цаашдын хэрэгжилтийн талаар мэргэжлийн түвшний санал, зөвлөмжийг хэлэлцлээ.
Уулзалтад Азийн хөгжлийн банкны Монгол Улс дахь Суурин Төлөөлөгчийн Газрын Хот Байгуулалт хариуцсан тэргүүлэх мэргэжилтэн Раушан Маматкулов, Улаанбаатар Хотын Нэгдсэн Төсөл Хэрэгжүүлэх Нэгжийн Зохицуулагч Б.Баатарзориг, Дэд зохицуулагч Б.Хишигтогтох, Барилгын хөгжлийн төвийн Хот төлөвлөлт, суурьшлын хөгжлийн газрын дарга Ж.Батболд, Норм нормативын хэлтсийн дарга Д.Алтанхуяг болон бусад холбогдох мэргэжилтнүүд оролцлоо.
